Wedi'i eni a'i fagu ym Mhontarddulais, addysgwyd Eric Jones yn Ysgol Ramadeg y Bechgyn Tregŵyr, cyn ennill gradd mewn Cerddoriaeth o Brifysgol Cymru, Caerdydd. Dechreuodd ei yrfa addysgu yn Llanelli, ac wedi hynny daeth yn Bennaeth Cerddoriaeth a'r Celfyddydau Creadigol yn Ysgol Mynyddbach yn Abertawe. Ar ôl cyfnod fel Dirprwy Bennaeth Ysgol Gyfun Gŵyr, daeth yn Bennaeth Ysgol Bro Myrddin, yr ysgol gyfun cyfrwng Cymraeg yng Nghaerfyrddin, gan ymddeol yn 2006. Mae ganddo Ddiploma Trwyddedog a Diploma Cymrodoriaeth o Goleg Cerdd y Drindod, Llundain, a gradd Meistr o'r Brifysgol Agored. Mae'n beirniadu yn yr Eisteddfod Genedlaethol ac mewn cystadlaethau lleisiol a chyfansoddi yn rheolaidd, ac fe'i derbyniwyd fel Urdd Ofydd Er Anrhydedd Gorsedd y Beirdd ym 1996 am ei wasanaethau i gerddoriaeth yng Nghymru.

Yn 2010 fe'i hanrhydeddwyd ymhellach fel Urdd Derwydd am wasanaeth hir a nodedig i'r Eisteddfod ac i'r Orsedd. Fel cyfansoddwr, mae wedi cyhoeddi chwe chyfrol o ganeuon a nifer mawr o weithiau corawl. Yn 2007, cyhoeddodd Gwasg Gomer Maestro, ei gofiant o arweinydd sylfaenol y côr, Noel Davies. Fel rhan o ddathliadau'r hannercanmlwyddiant yn 2010, ysgrifennodd lyfr o hanes y côr, sef Brothers Sing On, a gyhoeddwyd gan Y Lolfa. Daeth yn Llywydd Côr Meibion Pontarddulais yn 2004, wedi bod yn gyfeilydd y côr am ddeunaw mlynedd rhwng 1973 a 1991

Yn frodor o Murton ar Benrhyn Gŵyr, ganwyd Clive John Phillips ym 1959 ac fe'i haddysgwyd yn Ysgol Gynradd Llandeilo Ferwallt ac Ysgol Gyfun Tregŵyr. Derbyniodd hyfforddiant cerddoriaeth gan yr Athro John Edmunds LRAM, Brenda Llewellyn LRAM ARCM (piano) a John Morgan Davies LWCMD FTCL LRAM ARCM (organ). Penodwyd Clive fel cyfeilydd am y tro cyntaf i gôr lleol pan oedd yn 12 oed, ac ym 1977 daeth yn gyfeilydd a dirprwy arweinydd Côr Meibion Llanelli, rôl y bu ynddi tan y daeth yn Gyfarwyddwr Cerdd Côr Meibion Aberafan ym mis Chwefror 1983.

Yn dilyn cyfnod byr fel Cyfarwyddwr Cerdd Cynorthwyol Côr Meibion Dyfnant, penodwyd Clive yn Gyfarwyddwr Cerdd Côr Meibion Porth Tywyn, lle y bu tan y gwahoddodd Noel Davies MBE JP iddo ddod yn gyfeilydd Côr Meibion Pontarddulais, rôl y bu ynddi o 1991 tan 2002, pan benodwyd ef yn Gyfarwyddwr Cerdd.

Am nifer o flynyddoedd, ef oedd cyfarwyddwr cerdd Black Mountain Chorus of Wales, ac ef oedd cyfarwyddwr cerdd sylfaenol Llanelli Musical Players.

Mae Clive wedi arwain cyngherddau mewn nifer o leoliadau ledled y Deyrnas Unedig, gan gynnwys Neuadd Frenhinol Albert yn Llundain, Neuadd y Dref Chelmsford, Neuadd y Dref Rhydychen, Eglwys Gadeiriol Lincoln ac Eglwys Gadeiriol Caerwynt. Mae wedi arwain corau meibion cyfunedig hefyd yng Nghyngerdd Goffa Richard Burton ac yn seremoni agoriadol Eisteddfod Genedlaethol Abertawe 2006.

Mae wedi cael y fraint hefyd o arwain nifer o fandiau milwrol enwog mewn cyngherddau, gan gynnwys y Llynges Frenhinol, Gwarchodlu'r Alban, Gwarchodlu Coldstream a'r Gwarchodlu Cymreig.

Fel organydd mae wedi gwneud mwy na 30 o recordiadau gyda nifer o wahanol gorau, ac mae wedi chwarae mewn nifer o leoliadau, gan gynnwys Neuadd Frenhinol Albert, Neuadd Frenhinol yr Ŵyl, Neuadd Ganolog Westminster, Eglwys Gadeiriol Cofentri, Neuadd y Dref Birmingham, Neuadd Dewi Sant yng Nghaerdydd a Neuadd Brangwyn yn Abertawe. Mae wedi perfformio datganiadau organ mewn amrywiaeth o eglwysi yn ardaloedd Abertawe a Llanelli. Clive oedd yr organydd yng Nghymanfa Ganu Genedlaethol Gogledd America ym 1980, pan y'i cynhaliwyd yn Vancouver.

Fel cyfeilydd mae wedi cyfeilio i nifer o gantorion byd-enwog, gan gynnwys Delme Bryn Jones, Bryn Terfel, Rebecca Evans, ac yn fwy diweddar, Syr Willard White, Jason Howard, Alfie Boe ac Elin Manahan Thomas. Mae hefyd wedi cyfeilio i'r seryddwr nodedig, Patrick Moore, a oedd yn perfformio ei gerddoriaeth seiloffon ei hun mewn cyngerdd yn Neuadd Frenhinol Albert.

Clive yw organydd Capel Tabernacl y Mwmbwls ar hyn o bryd.

Ar 13 Mai 2017 derbyniodd Clive wobr haeddiannol gan Gymdeithas Tregŵyr am wasanaeth neilltuol i'r gymuned, yn bennaf am ei waith gyda chorau ac ym maes cerddoriaeth yn gyffredinol yn yr ardal.

Mae David wedi perfformio ledled y byd fel cyfarwyddwr cerdd a chyfeilydd, ac mae'n uchel ei barch fel trefnwr, gan gynnwys trefnu ar gyfer cerddorfa. Mae wedi perfformio yn Seland Newydd, Awstralia, UDA, De Affrica, Chile, Ynysoedd Malvinas, yr Ariannin, Cyprus, Ffrainc, yr Almaen, Gwlad Belg, Canada, Sbaen, Gibraltar, Jersey, Iwerddon, y Swistir, y Weriniaeth Tsiec, Slofacia, Awstria, Gwlad Pwyl, Hong Kong ac ar fordaith o gwmpas rhanbarth y Baltig, gan gynnwys perfformiadau yn Nhŷ Opera Sydney a Neuadd Carnegie yn Efrog Newydd.

Ymunodd David â Chôr Meibion Pontarddulais fel prif gyfeilydd yn 2012, wedi cyfeilio i'r côr o'r blaen rhwng 2001 a 2007. Mae wedi cyfeilio i'r côr mewn buddugoliaethau yn Eisteddfod Ryngwladol Llangollen a thair gwaith yn yr Eisteddfod Genedlaethol Frenhinol. Ef oedd cyfeilydd Côr Meibion Llewod Prydain ac Iwerddon, gan gyfeilio ar y piano a'r organ yn Nhŷ Opera Sydney (2005) ac yn Neuadd y Dref Sydney (2013), yn ogystal ag amrywiaeth o leoliadau ledled y Deyrnas Unedig, Seland Newydd, De Affrica ac Awstralia. Yn 2008 cyfeiliodd i gôr meibion cyfunedig a Bryn Terfel ar y piano a'r organ yn Neuadd Carnegie, Efrog Newydd. Mae wedi cyfeilio hefyd i gorau meibion Orffews Treforys, Cymry Llundain a Wessex; i'r unawdwyr Katherine Jenkins, Beverley Humphreys, Shân Cothi, Sian Hopkins, Anthony Stuart Lloyd a Rebecca Evans; ac, ychydig cyn y Gamp Lawn yn 2005, i dîm rygbi Cymru. Mae wedi gweithio hefyd ochr yn ochr â Dr Haydn James gyda charfan Llewod Prydain ac Iwerddon 2017.

David oedd Cyfarwyddwr Cerdd Côr Meibion Cardiff Arms Park rhwng 2001 a 2016 a chyfarwyddwr cerdd Côr Meibion Dowlais rhwng 2007 a 2012. Mae wedi arwain digwyddiadau corau cyfunedig yn Neuadd Dewi Sant, Canolfan Mileniwm Cymru a Neuadd Symffoni Birmingham; wedi bod yn gyfrifol am dri chant o gerddorion o wyth gwlad wahanol ar gyfer chwe pherfformiad o flaen cynulleidfaoedd o hyd at 20,000 yn Festival Interceltique Lorient; ac wedi arwain yn fyw ar BBC Grandstand, yn Stadiwm y Mileniwm ac ar y Champs Élysées. Mae wedi arwain Hayley Westenra, Peter Karrie, Max Boyce, Band Cory a Sinfonia Cymru, ond yn anffodus, nid ar yr un pryd.

David yw Arweinydd Cwrs y Celfyddydau Perfformio ym Mhrifysgol Swydd Gaerloyw ac mae'n darlithio mewn llais a theatr gerdd, yn ogystal â bod yn gyfarwyddwr cerdd eu perfformiadau. Mae wedi cyfansoddi nifer o sioeau cerdd cyfan ar ben ei drefniannau a threfniannau cerddorfaol niferus.